Luk 8 | KYG | STEP | Aise afina'mo utegeno Yesu'a muki aise taonifi'e muki alopa taonifi'e'mo alagepa faigoko gemo Goti'a yagaino ne'apateya kavafe'mo ava gemo aeno hakalo huno hapa paimale hapa paimale hulino uneno huno mai'niye. Agae'e'mo tuolofu'a vaya'mo ge'amo ne'afiya vaya'e

Luke 8

Yesu'e'mo mago a'ne anaga'mo lokaeli'a u'naya gemae

1 Aise afina'mo utegeno Yesu'a muki aise taonifi'e muki alopa taonifi'e'mo alagepa faigoko gemo Goti'a yagaino ne'apateya kavafe'mo ava gemo aeno hakalo huno hapa paimale hapa paimale hulino uneno huno mai'niye. Agae'e'mo tuolofu'a vaya'mo ge'amo ne'afiya vaya'e 2 mago a'ne anaga'e'mo lokaeli'a u'e'a hu'a mai'nae. Yesu'a hogoteno hosu apaune vaya'mo ani a'ne anaga'ai apaipafati'mo alino hapa faino apatalege kaita hapau'niya a'ne'aina alino alagepa huno apatege hu'niya a'ne'e'mo lokaeli'a u'nae. Ani a'nefati'mo Maliya'a Maganala kotega a'mo aipafati'mo seveni'a hosu apaune vaya'mo alino hapa faino apatale'niya a'mo maige 3 Yovana anau'amo agimo Suya'a Heloti no'afi yate'mo ne'yagaiya vekamo a'mo maige Susana'e mago'e asole a'ne anaga'mogi'e'mo moni'e ne'ya'e'mo ha mae'a amige amige hu'a mai'nae.

Avina yafe'mo ava gemo hu'niya gemae

(Mt 13:1-9; Mk 4:1-9)

4 Muki asole vaya'mo taoni'afati taoni'afati'mo ete ete hu'a ali'a anupa hu'a mai'nageno'ae'mo Yesu'a aeno kalafefa gemo hapa paino'ae'mo, 5 mago vekamo'a avina ya'mo hakalesiyafe'mo u'niye. Ne'uno'ae'mo yaga auno ataleme ataleme u'nigeno'ae'mo mago avina ya'mo kate'mo asagauno ai'nige'apae'mo vaya'mo u'e'a hu'apae'mo ae'a latapai'nageno nama anaga'mogimo e'a ne'nae. 6 Mago avina ya'mo yafa agotofule'mo asagauno aiteno hage'niyana ani'mo ohane'niya'mofe'mo hagegeno'ae'mo malage huno ago falu te'niye. 7 Mago avina ya'mo aufe nofi'mo hane'niya mopafi'mo asagauno aiteno hage'niya'monanafa aufe nofi'mo'a ago kino ati kae'niye. 8 Mago avina ya'mo alagepa mopafi'mo asagauno aiteno hageno haineno'ae'mo vani hataleti'a alagamo ae'niye. Gemo ne'afisaya lapakesa hane'nisiyana mani gemo alagepa hutapa afiyo, huno hapa pai'niye.

Yesu'a aeno kalafefa gemo hu'niya gemo aepa'amo hapa pai'niya gemae

(Mt 13:10-17; Mk 4:10-12)

9 Ge'amo ne'afiya vaya'mogi agaefe'mo, ani aeka kalafefa gemo aepa'amo na agufa gemo hu'nane, hu'a afi ge'nageno 10 Yesu'a, lapakaemo Goti'a yagaino ne'apateya kava'mo alino fala ki male'neno ago alino afole aino ate'niya gee'mo ae'na kalafefa gemo aepa'amo

lapakaemo afa'a afigaya'monanafa mago vaya'mogimo alagi o'afigae. Apakaemo agegaya'monanafa age'a aeto osuge afigaya'monanafa afi'a aeto osuge hisayafe'mo
ae'na kalafefa gemo hu'na hapa nepauve. 11 Ae'na kalafefa gemo nehuva gemo aepa'amo hane'niyana avina yakana huno Goti ge'amo hane'niye. 12 Mago avina ya'mo kate'mo asagauno ai'niya avina yakana hu'a vaya'mogi Goti ge'amo afitageno'ae'mo Satani'mo eno ani gemo apaipafati'mo alinino ne'viye. Satani'a, fiku yanage'a ge'ae'mo apakesa afi'a fatago hisageno Goti'a apakufamo alino katino apategaiye, huno agesa ne'afiye. 13 Mago avina ya'mo yafa agotofule'mo asagauno ai'niya avina yakana hu'a mago vaya'mogi Goti ge'amo afite'apae'mo apamogaga ne'aiye. Hafu'yamo mopafi o'ae'niya kava hu'a yoka apakesa afi'a fatago hu'nageno'ae'mo apamalageka nehiya afina'mo atale'a ago asagau'a ne'aiye. 14 Mago avina ya'mo aufe nofi'mo hane'niya mopafi'mo asagauno ai'niya avina yakana hu'a mago vaya'mogi Goti ge'amo afite'apae'mo atale u'a ma mopafi kavafe'mo hapausoli huge monie'mo apakesa ala'amo afige ma mopafi kavafe'mo apamogaga aige hu'a maime maime ne'vageno'ae'mo ani kava'mo'a aeno apati kae'nigeno alaga'amo ne'aeyana afu nole. 15 Mago avina ya'mo alagepa mopafi'mo asagauno ai'niya avina yakana hu'a mago vaya'mogi Goti ge'amo afite'apae'mo ali'a lama ge apaipamo alagepa apaipafi'mo malete'apae'mo alagepa kate'mo uge uge hu'a ne'mai'apae'mo alagepa alagamo ne'ae.

Lamu kanife'mo hu'niya gemae

(Mk 4:21-25)

16 Vaya'mogi lamufi'mo kani ae'a kaete'apae'mo ai'a ati kaete'a hipakapi'mo no'malafa nopi'mo hai e'a maisaya vaya'mogi alagepa hu'a age'a ha le'a maisayafe'mo anaga hi'yalamute'mo ne'malae. 17 Muki ya'amo fala ki'niya ya'mo alino afole aino ategaiye. Muki kava'mo hu'a ae'a ati nekaya kava'mo afole yategamo afole aigiye. 18 Ali'nisaya vaya'mo mago'e ya'mo alino apamigiya'monanafa o'ali'nisaya vaya'mogimo ali'none, hu'a apakesa ne'afisaya vaya'aitegati'mo hapa faleno aligiye. Aligiya'mofe'mo ehetapiye, Goti ge'amo ne'afitapae'mo alagepa hutapa lapakesa afiyo.

Yesu ita'amo'e agana'amogi'e'mo agaetegamo e'naya gemae

(Mt 12:46-50; Mk 3:31-35)

19 Yesu ita'amo'e agana'amogi'e'mo agaetegamo e'nayana asole vaya'mo mai'a kili pae'naya'mofe'mo o'age'nae. 20 Mago vekamo'a, itakamo'e kaganakamogi'e'mo kagesayafe'mo e'a kumatega mai'nae, huno ha pai'nigeno, 21 ge'nimo afite'a akame nehaya vaya'mo ita'nimogi maige nagana'nimogi maige hu'a mai'nae, huno hapa pai'niye.

Yesu'a yasie'mo alika hano huvo, huno hu'niya gemae

(Mt 8:23-27; Mk 4:35-41)

22 Mago afina'mo Yesu'e ge'amo ne'afiya vaya'e'mo sipifi'mo hai'a mai'ne'apae'mo, ani kotu'mo mugagayaga faligamo lakaeta ugune, huno hapa pai'nige'apae'mo ani kotu agi'naleti'mo atale'a u'nae. 23 Ne'u'apae'mo Yesu'a au kaleno mai'niye. Ani kotute'mo lusi kava huno yasimo ali'nigeno ani'mo aino holakau holakau huno sipifi'mo haino havaiteme havaiteme u'nige'apae'mo ae'a lapanegefe'mo hu'nae. 24 U'a aupati'mo hau ne'ne'apae'mo, Ala kava nene, Ala kava nene, aeta lapanegefe'mo nehune, hu'a ha pai'nageno aupati'mo he tino ani'mo'a lusi kava huno aino holakau holakau hu'niya ani'e yasi'efe'mo, afa'a hano hi'ao, huno hana pai'nige'ana ge'amo afite'ana hano hu'na'ae. 25 Yesu'a, lapakesa afitapa fatago hu'naya kavatapimo haiya'ale'mo hane'niye, huno apafi ge'nige'apae'mo koli hute'a apakai'apimo, yasimo'e ani'mo'e'mo ge'amo afi'na'agi mani vekamo na agufa vekamo mai'niye, hu'a hute'a hapau ai'a mai'nae.

Yesu'a negi nagi nehiya vekamo aipafati'mo hosu apaune vaya'mo alino hapa faitale'niya gemae

(Mt 8:28-34; Mk 5:1-20)

26 Lakae'a u'a Gelasini kotegamo ava'yi hu'nae. Ani ko'mo ani agi'nale'mo hane'nigeno Galeliyamo mugagayaga faliga hane'niye. 27 Yesu'a sipifati'mo ataleno lamino ani agi'nale'mo aiyamo ne'aegeno'ae'mo mago vekamo anile'mo hogoteno hane'niya taonifi'mo mai'niya vekamo aipafi'mo hosu apaune vaya'mo mai'naya vekamo ne'ege'ana fotu hu'na'ae. Agaemo kukena vaino o'alige nopi'mo ohavaege huteno kanolufike'mo yafakapi'mo mai'niye. 28 Agaemo Yesu'a ageteno'ae'mo, ai, aeteno Yesu aiyafi'mo eno ago'ya fai'neno alopa gefati'mo ge huno'ae'mo, Yesuo, Hogote Anaga vekamo mafa'ne'amogae, nagaetegamo na agufa kava'mo huka natesanafe'mo ne'ane. Nagafu kisiya agufa kava'mo nagaetegamo osisanafe'mo kahao ke nehove, huno ha pai'niye. 29 Yesu'a hogoteno hosu aune vekae'mo, emikeka ataleka uvo, huno ha pai'niya'mofe'mo hosu aune vekamo'a ani gemo ha pai'niye. Muki afina'mo hosu aune vekamo'a atafauno mai'nigeno seli nofiteti'mo ayatalate kite aiyalate kite hu'a ki'a ate'naya seli nofi'mo ago alino kapalu ae'nigeno hosu aune vekamo'a alino hafaitale'nigeno ka'me kotega ute ute huno mai'niye. 30 Yesu'a, kagikamo ina lagae, huno afi ge'nigeno'ae'mo, Nagi'nimo Asole vaya'nae, huno ha pai'niye. Asole hosu apaune vaya'mo aipafi'mo mai'naya'mofe'mo agi'amo Asole vaya'ae. 31 Hosu apaune vaya'mogi, kahao ke honanagi ive kelifi'mo alika lahafaika olato, hu'a ha pai'nae.

32 Asole afu anaga'mo mago aise ave haopale'mo kahaumo ne'a mai'nae. Apakaemo Yesufe'mo, kahao ke honanagi alika lahafaitalegeta uta afu anaga'ai apaipafi'mo faleta haita maino, hu'a ha pai'nageno'ae'mo, he, afa'a viyo, huno hapa pai'niye. 33 Hosu apaune vaya'mo ani vekamo aipafati'mo atale lami'a afu anaga'ai apaipafi'mo fale'a hai'nage'apae'mo afu anaga'mo mulifati'mo nagu nagu hu'a lami'a anipi'mo asagau'a aite'a ani'mo nete'a fali'nae. 34 Ani afu'aite'mo ne'yagaiya vaya'mogi ani kava'mo agete'apae'mo apaune hetale u'a taonifi'e muki haopalega'e'mo ani kavafe'mo ava gemo hu'a hapa pai'nageno aino atagu faeno uneno hu'niye. 35 Muki vaya'mogi ani kavafe'mo ava gemo afite'apae'mo agesayafe'mo Yesutegamo u'a agayana hosu apaune vaya'mo ago atale'a u'naya vekamo agesa aino halo ai'nigeno kukenamo alino vaiteno Yesu aiyafi'mo mai'nige'a agete'apae'mo apamo'ya ai'nae. 36 Age'nageno Yesu'a hosu apaune vaya'mo aipafati'mo alino hapa faino apataleteno alino alagepa huno ate'niya kavafe'mo ava gemo hu'a hapa pai'nae. 37 Ani ko'mo agi'amo Gelasini kotega haopale'mo mai'naya vaya'mogimo ani kavafe'mo lusi kava hu'a koli hute'apae'mo, mani kote'mo ataleka uvo, hu'a ha pai'nageno sipifi'mo haino maitege'apae'mo ge'amo ne'afiya vaya'e'mo halate ai'a atagi ne'a u'nae. 38 Ugefe nehageno'ae'mo hosu apaune vaya'mo aipafati'mo alino hapa faino apatale'niya vekamo'a Yesufe'mo, kahao ke hovanageta'a ugu'ae, huno ha pai'niyana 39 halate nokalega aika atagi nekuka Goti'a lusi kava huno kaha mae'niya kavafe'mo ava gemo huka hapa paiyo, huno ha pai'nigeno uno muki taonifi mai'naya vaya'aife'mo Yesu'a lusi kava huno ha mae'niya kavafe'mo ava gemo huno hapa pai'niye.

Yesu'a mago a kanomo alino alagepa huno ateteno Yailasi a'mafa'nemo alino he tino ate'niya gemae

(Mt 9:18-26; Mk 5:21-43)

40 Yesu'a aino atagi neno e'nige'apae'mo agava mai'ne'a ali'a falu fala hu'a ate'nae. 41 Mago vekamo Yu monote'mo ne'yagaiya vekamo agi'amo Yailasi'a Yesutegamo eno aiyafi'mo ago'ya fai'neno, kahao ke hogi a'mafa'ne'nimo faligefe nehigi nagae notega ugeta'ao, huno ha pai'niye. 42 Magoke'atomo alino ate'niya a'mafa'nemo'mo tuolofu'a kafugamo mai'niya a'mafa'nemo kaita hau'nigeno faligefe'mo hu'niye.

Inagi Yesu'a ne'vige'apae'mo asole vaya'mogi male'a apalime apalime u'nae. 43 Mago a kanomo tuolofu'a kafugamo aigu'ya'mo hauge hauge huno mai'niye. Agaemo muki lota vaya'aitegamo uno moni'amo apamino hano hu'niyana ha o'mae'nae. 44 Ani a kanomo'a Yesu akamelegamo ne'eno'ae'mo kukena'amo atupa'ale'mo ame ne'aligeno'ae'mo malage huno aigu'ya'amo hano hu'niye. 45 Yesu'a, ina la'mo eno name ali'niye, huno apafi ge'nige'apae'mo muki vaya'amogimo, lagaemo kame o'ali'none, hu'a ha pai'nae. Pita'e'mo magokepi mai'naya vaya'mogimo, Tisao, muki vaya'mogimo male'a nekapaligekae'mo ina la'mo name ali'niye, huka nehane, hu'a ha pai'nageno'ae'mo 46 Yesu'a, himamu'nimo ago u'niya'mofe'mo age'novana mago vekamo'a name ali'niye, huno hapa pai'nigeno 47 ani a kanomo'a age'niyana ago nage'niye, huno agesa afiteno atete haume haume eno Yesu haopale'mo ago'ya fai'neno muki vaya'ai apaulagale'mo huno'ae'mo, alika alagepa huka natesanafe'mo ame ali'nogeno aigu'ya'nimo malage huno hano hu'niye, huno ha pai'nigeno'ae'mo, 48 a'mafa'ne'nimogae, kamogaga aiyo. Nagaefe'mo kagesa afika fatago nehana kavakamo'mo alino alagepa huno kate'nigi kaipamo'mo falu hu'ninageka afa'a uvo, huno ha pai'niye.

49 Ha nepaigeno'ae'mo mago yagaino ne'apateya vekamo notegati'mo mago vekamo eno ava'yi huteno'ae'mo, a'mafa'nekamo ago fali'nigi tisa vekamo mago ali'ya'mo alika o'amiyo, huno ha pai'nigeno 50 Yesu'a afiteno'ae'mo, koli osuka nagaefeke'mo kagesa afika fatago hugeno'ao a'mafa'nekamo afa'a alagepa huno maino, huno ha pai'niye.

51 Yesu'a uno ani vekamo no'ale'mo ava'yi huteno muki vaya'aife'mo, kumatega maiyo, huno hapa paiteno Pita'agi Yoni'agi Yemisi'agi ita'afo'ala'moganimogi huno nopi'mo apavalelino hai'niye. 52 Muki vaya'mogi faiyosago fai'a avi'ya huge huge hu'a mai'nageno'ae'mo Yesu'a, avi'ya osiyo. Ani a'mafa'nemo alagi ofali'nifa afa'a au kaleno mai'niye, huno hapa pai'nige'apae'mo, 53 ago fali'niye, hu'a age'naya'mofe'mo kigi hu'a ate'nae. 54 Agaemo kumatega mai'niyo, huno hapa paiteno haino ayate'mo atafau'neno, a'mafa'neyo, he tiyo, huno ha pai'nigeno 55 auneme'amo halate aino atagi neno eno agufafi fale'nigeno malage huno he ti'niye. Yesu'a, ne'ya'mo alita amiyo, huno hapa pai'niye. 56 Ita'afo'ala'moganimo hanau ai'na'ageno'ae'mo, mago vekae'mo utana ha opai'ao, huno hana pai'niye.